ԱՄՆ աջակցության շնորհիվ օգնում ենք ճգնաժամային իրավիճակում հայտնված անձանց
Հրապարակվել է 20 փտվ, 2025 թ. կարդալու ժամանակը՝ 7 րոպե Sdílet: Sdílet článekՍնունդը, կացարանը, խմելու ջուրը, վառելիքը և հիմնական բուժօգնությունը մարդասիրական աջակցության այն օրինակներն են, որոնք մենք տրամադրել ենք հարյուր հազարավոր մարդկանց Ուկրաինայում, Սիրիայում, Կոնգոյի Դեմոկրատական Հանրապետությունում և Հայաստանում՝ ԱՄՆ կառավարության տրամադրած աջակցությամբ։ Սակայն ԱՄՆ-ի կողմից ֆինանսավորվող մեր ծրագրերի կասեցումը լուրջ ազդեցություն է թողել ճգնաժամային բնակավայրերում ապրող քաղաքացիական բնակչության վրա։ Սիրիայում ավելի քան 140 հազար մարդ մնացել է առանց պարենային օգնության։
Մեր «SOS» ֆոնդահայթայթման նախաձեռնությունն ու «Մարդը կարիքի մեջ» ՀԿ-ի Club of Friends հիմնադրամը հնարավորություն են տալիս որոշ չափով մեղմել այս հետևանքները։
Աշակերտին կրթություն տալու փոխարեն միլիոնավոր սիրիացիներ ստիպված են ընտրել՝ ով ավելի շատ սննդի կարիք ունի և ում հնարավորություն կտրվի հագեցնել սովը։ Նրանց վաստակածը հազիվ է բավարարում գոյատևելու համար։ Պատերազմից տուժած տնտեսության հետևանքով հաց հայթայթելը Սիրիայում դարձել է առօրյա պայքար։
ԱՄՆ-ի կողմից ֆինանսավորվող մեր ծրագրերից մեկի շրջանակում 38 գյուղում գրեթե 21,000 ընտանիքի հաց է մատակարարվել սուբսիդիաների միջոցով։ Նրանց թվում է նաև Սահարի ընտանիքը, որը խնամում է իր երկու թոռներին․ նրանց մայրը զոհվել է օդային հարվածի հետևանքով։
Սահարը մի քանի անգամ է տեղահանվել։ Երբ հանդիպեցինք նրան, ապրում էր մի վրանում, որը գտնվում էր ոչ ֆորմալ կացարանում։
Սիրիայի հյուսիսից գաղթած Խալեդը պատմում է մեր կողմից տրամադրված էլեկտրոնային սննդի կտրոնների առավելությունների մասին.
«Երեխաները ցանկանում էին աշխատել՝ ընտանիքի հոգսը թեթևացնելու համար, սակայն այս դրամային կտրոնների շնորհիվ ես համոզեցի նրանց շարունակել ուսումը», — ասում է Խալեդը։
Ներկայումս, չենք կարող շարունակել սննդային կտրոնների տրամադրումը, քանի որ այս ծրագրի ֆինանսավորումը դադարեցվել է։ Միակ շարունակվող գործունեությունը հացի արտադրամասներին տրամադրվող աջակցությունն է, քանի որ սուբսիդավորված հացի համար նախատեսված ալյուրն արդեն գնվել և մատակարարվել է։
ԱՄՆ-ի կողմից ֆինանսավորվող մեր ընթացիկ ծրագրերի շրջանակում կարողացել ենք աջակցել 400,525 մարդու։ Սակայն ֆինանսավորման սառեցման պատճառով ստիպված ենք դադարեցնել կենսական նշանակության ծրագրերը, այդ թվում՝ սննդի աջակցությունը։ Սիրիայում սա նշանակում է, որ ավելի քան 140,000 մարդ այժմ մնացել է առանց սննդի, խմելու ջրի և գյուղատնտեսական աջակցության՝ չնայած շարունակվող և ահռելի կարիքներին։
Կոնգոյի Դեմոկրատական Հանրապետություն․ բուժում թերսնուցումից տառապող երեխաների համար
Դրամական օգնությունը կենսական նշանակություն ունի Կոնգոյի Դեմոկրատական Հանրապետության արևելքում ավելի քան 2500 ընտանիքի համար: Այս տարածաշրջանը տարիներ շարունակ պայքարում է հակամարտությունների դեմ, իսկ հարյուր հազարավոր մարդիկ լքել են իրենց տները: Ավելին, միայն վերջին մի քանի ամիսների ընթացքում մենք պարենային օգնություն ենք տրամադրել գրեթե 5000 ընտանիքի, ինչը կարևոր է նրանց գոյատևման համար, երբ նրանք լքում են պատերազմական գոտին: Փախուստի դիմած ընտանիքները կանգնած են սննդի լուրջ պակասի առաջ, քանի որ ստիպված են եղել թողնել իրենց տներն ու կուտակած ռեսուրսները։
Բացի պարենային և դրամական օգնությունից, ԱՄՆ-ի կողմից տրամադրված ֆինանսավորումը հնարավորություն է տալիս վերանորոգել ջրամատակարարման աղբյուրները։ Այս աշխատանքը կարևոր նշանակություն ունի, քանի որ ջուրը կենսական ռեսուրս է կյանքի պահպանման համար, իսկ Կոնգոյի Դեմոկրատական Հանրապետության արևելքում բազմաթիվ համայնքներ չունեն ապահով և մաքուր խմելու ջուր։ Աղտոտված ջրի օգտագործումը հաճախ հիվանդությունների պատճառ է դառնում՝ վտանգելով հատկապես երեխաների առողջությունը։
Թերսնուցման հետևանքով երեխաները շարունակում են մահանալ։ Մենք հազարավոր մարդկանց օգնել ենք՝ տրամադրելով բուժիչ պատրաստի սնունդ հեռավոր առողջապահական կենտրոններում։ ԱՄՆ Միջազգային զարգացման գործակալության աջակցության շնորհիվ Մուլենգիի մեր բուժաշխատողները այդ սնունդը տրամադրեցին երիտասարդ Էմերիին՝ թերսնուցման պատճառով ծանր վիճակում գտնվող փոքրիկին։ Նրա մայրը օգնության դիմեց այն պահին, երբ հասկացավ, որ որդին շատ հիվանդ է։ Սակայն ոչ բոլոր երեխաներն ու ծնողներն են կարողանում ստանալ անհրաժեշտ սնունդը, քանի որ բժշկական սննդի պակասը շարունակում է լուրջ խնդիր մնալ։
Կոնգոյի Դեմոկրատական Հանրապետությունում մեր գործընկերները ծնողներին սովորեցնում են, թե ինչպես պատրաստել սննդարար ուտեստներ՝ տեղական արտադրանքներով։ Հեռավոր գյուղերում մենք կազմակերպում ենք համատեղ խոհարարական ցուցադրություններ՝ օգտագործելով հասանելի բաղադրիչներ, ինչպիսիք են ալյուրը, ձուկը, կարագը, շաքարավազը և բանջարեղենը։
Ուկրաինա․ ջեռուցման և կացարանի աջակցություն
Պատերազմի երրորդ տարվան մոտենալուն զուգընթաց Ուկրաինայում մարդասիրական կարիքները շարունակաբար աճում են։ ԱՄՆ-ի աջակցությամբ մենք վերանորոգել ենք վնասված տները, տրամադրել վառելիքի բրիկետներ և վերականգնել մաքուր ջրի մատակարարումը։
Վառելիքի աջակցությունը կենսական նշանակություն ունի մարտական գոտիներում ապրող համայնքների համար, որտեղ շատերը կորցրել են իրենց աշխատանքը։ Չեռնոբաևկայում՝ Խերսոնի շրջանի առաջնագծից ընդամենը 5 կիլոմետր հեռավորության վրա գտնվող գյուղում, մենք վառելիքի բրիկետներ ենք տրամադրել բազմազավակ ընտանիքներին և հաշմանդամություն ունեցող մարդկանց։
Ուկրաինայի արևելյան և հարավային մասերում շարունակվող հրետակոծությունները ծանր վնասներ են հասցրել ջրամատակարարման ենթակառուցվածքներին։ Մենք աջակցել ենք բազմաթիվ ջրամատակարարման ընկերությունների՝ վերականգնելով մաքուր ջրի մատակարարումը հազարավոր մարդկանց համար։ Օրինակ, այն սարքավորումները, որոնք մենք տրամադրել ենք Մարգանեց քաղաքի ջրամատակարարման ընկերությանը, այժմ ապահովում են անվտանգ խմելու ջուր ավելի քան 30,000 բնակչի համար։
Մշտական հրետակոծության տակ ապրող մարդիկ ունեն հիգիենայի պարագաների և այնպիսի վերանորոգման նյութերի կարիք, որոնք անհրաժեշտ են բնակարանների շտապ վերանորոգման համար։ ԱՄՆ-ի աջակցությամբ մենք մշտապես փորձում ենք ապահովել նրանց անհրաժեշտ պարագաներով։ Մենք նաև կահավորել ենք հավաքակայանները և կանխիկ գումար հատկացրել նրանց, ովքեր ստիպված էին լքել իրենց տները։
Չդադարող հարձակումները ստիպել են հազարավոր մարդկանց լքել իրենց տները։ Շատ տեղահանված ընտանիքներ շտապ ֆինանսական աջակցության կարիք ունեն՝ իրենց կյանքը վերականգնելու համար։ ԱՄՆ-ի աջակցությամբ մենք աջակցել ենք բռնի տեղահանված ձեռնարկատերերին՝ վերսկսելու իրենց բիզնեսները։ Դրամաշնորհների շնորհիվ Աննան, ով փախել է Դոնեցկի մարզից, լքել է իր բիզնեսը և մանկապարտեզ հիմնել արևմտյան Ուկրաինայում, որտեղ ապահով տարածք է տրամադրում տեղահանված երեխաներին՝ նրանց կրթելու համար։
Այս պահին ստիպված ենք եղել դադարեցնել տեղադրված բիզնեսների ֆինանսական դրամաշնորհների տրամադրումը։ Այս դադարեցումն անմիջականորեն ազդեց շուրջ 2,500 մարդու վրա։ Հաշվի առնելով այս իրավիճակը՝ մենք ուսումնասիրում ենք այլընտրանքային հնարավորություններ՝ այս դրամաշնորհների միջոցով շարունակական աջակցություն ապահովելու համար, ներառյալ մեր «SOS Ուկրաինա» ֆոնդհայթայթման միջոցների օգտագործումը:
Հայաստան․ մանկական զարգացման կենտրոններ տեղահանված երեխաների համար
2020 թվականի սեպտեմբերից Հայաստանը բախվել է բազմաթիվ դժվարությունների։ Լեռնային Ղարաբաղի 44-օրյա պատերազմը հազարավոր մարդկանց ստիպել է լքել իրենց տները։ Երեխաների համար դա լրացուցիչ սթրես էր՝ խաղալու հնարավորությունների բացակայությամբ, ընտանիքի անդամների արցունքներ տեսնելու և պատերազմական գծում հարազատների կորուստների մասին լսելու պատճառով։
Երեխաների սթրեսն ու տրավմաները հաղթահարելու համար մենք Գորիսում հիմնել ենք Մանկական զարգացման կենտրոններ, իսկ այդ գործընթացում ներգրավել ենք հոգեբանների։ ԱՄՆ ՄԶԳ-ի ֆինանսավորմամբ մենք ընդլայնել ենք մեր աշխատանքները՝ ստեղծելով ևս հինգ մանկական զարգացման կենտրոն, այդ թվում՝ հեռավոր, գյուղական և սահմանամերձ համայնքներում։ Այս տարածքները ծառայում են ավելի քան 300 տեղահանված և խոցելի երեխաների։ Շատ երեխաների, ինչպես օրինակ 11-ամյա Ալեքսանդրի համար, այս աջակցությունը մեծ նշանակություն ունի։ Նա պատերազմում կորցրել է մորը և այժմ ապրում է մորաքրոջ հետ Գորիսում։ Նրա սիրելի վայրերից մեկը Մանկական զարգացման կենտրոնն է, որտեղ նա հաճախ նկարում է մոր դիմանկարները և երազում նրա մասին։
Հայաստանի դժվարությունները չավարտվեցին 2020 թվականի պատերազմով։ 2023 թվականին ավելի քան 120 հազար էթնիկ հայեր ստիպված եղան լքել Լեռնային Ղարաբաղը։
Մեր աջակցությունը ներառում է հիգիենայի փաթեթներ, հագուստ և տեխնիկայի դրամային կտրոններ։ Մենք նաև աջակցում ենք մարդկանց ձմեռման համար՝ հոգալով կոմունալ ծախսերը և տրամադրելով էկոլոգիապես մաքուր վառելիք։ Ավելին, մեր մասնագիտական ուսուցման հնարավորությունները և փոքր ընտանեկան բիզնեսների աջակցությունը կարևոր են Հայաստան տեղափոխված մարդկանց ինտեգրման համար։
Բացի արտակարգ իրավիճակների հումանիտար արձագանքից՝ ԱՄՆ-ի ֆինանսավորմամբ մենք կառուցել ենք թաքստոցներ Հայաստանի սահմանամերձ համայնքներում՝ ապահովելով քաղաքացիական բնակչությանը բնական և տեխնածին աղետների ժամանակ անվտանգ կացարաններ։
Այս պահին Հայաստանում ԱՄՆ-ի ֆինանսավորմամբ իրականացվող երկու ծրագրերը ժամանակավորապես դադարեցված են։ Այնուամենայնիվ, մենք շարունակում ենք հավատարիմ մնալ մեր սկզբնական նպատակներին և չվնասել համայնքերի առաջընթացին։
Կարիքները շարունակում են կրիտիկական մնալ
ԱՄՆ կառավարության կողմից ֆինանսավորումը կազմում է մեր մարդասիրական և զարգացման աջակցության մոտավորապես մեկ քառորդը: Միայն 2023 թվականին ԱՄՆ-ի ֆինանսավորմամբ տրամադրված օգնությունը, որն իրականացվել է «Մարդը կարիքի մեջ» ՀԿ-ի կողմից, հասել է մոտ 830,000 մարդու։
Չնայած մեր բոլոր ջանքերին՝ օգնության անհրաժեշտությունն աճում է ոչ միայն Սիրիայում, այլեւ Կոնգոյի Դեմոկրատական Հանրապետությունում, Ուկրաինայում, Հայաստանում և այլ երկրներում։ Միեւնույն ժամանակ, աջակցություն ցուցաբերելու մեր կարողությունը նվազում է ֆինանսավորման կրճատման պատճառով։ Մասնավոր դոնորների և անհատների աջակցությունը կարևոր կլինի՝ ապահովելու օգնությունն այնտեղ, որտեղ այն առավել անհրաժեշտ է, և մեղմելու ԱՄՆ արտաքին քաղաքականության փոփոխությունների ազդեցությունը։