Հայաստան

Ներկայումս մենք հիմնականում գործունեություն ենք ծավալում քաղաքացիական հասարակության և պետական կառույցների հետ աշխատանքներում, ինչպես նաև աջակցություն ենք տրամադրում հակամարտությունների ու աղքատության հետևանքով ծանր կացության մեջ հայտնված մարդկանց։

Հատուկ ուշադրություն դարձնելով քաղաքացիական հասարակությանն ու ներառական կառավարմանը՝ մենք աջակցում ենք քաղաքացիական հասարակությանը պետական կառույցների հետ համագործակցության՝ մասնակցային ժողովրդավարական գործընթացները խթանելու և ներառական հանրային ծառայությունները զարգացնելու համար։ Բացի այդ՝ հատուկ ուշադրություն ենք դարձնում միգրացիայի կառավարման համակարգի կատարելագործմանը՝ նպատակ ունենալով ապահովել ինչպես Հայաստան վերադարձող, այնպես էլ այլ երկրներից ժամանող անձանց հաջող ինտեգրումը և ակտիվորեն ներգրաված ենք միգրացիոն և ինտեգրացիոն քաղաքականությունների մշակման և բարելավման գործընթացներում։ Միաժամանակ գործունեություն ենք ծավալում Սյունիքի մարզի համայքներում սոցիալական ծառայությունների ամրապնդման ուղղությամբ՝ նպաստելով սոցիալական պաշտպանության առավել կայուն համակարգի ստեղծմանը։ 2016 թվականից սկսած մենք աջակցում ենք նաև Ֆրանսիայից կամավոր վերադարձած միգրանտներին՝ նպաստելով նրանց վերաինտեգրմանը Հայաստանում։

Արտակարգ իրավիճակների արձագանքման և վերականգնման ոլորտում՝ մասնավորապես 2020 թվականի Լեռնային Ղարաբաղի տեղահանությունից հետո, մեր ջանքերն ուղղված են օգնելու նրանց, ովքեր ստիպված են եղել լքել իրենց տները։ Մեր կողմից տրամադրվող աջակցությունը ներառում է մարդասիրական օգնություն, հոգեբանական աջակցություն, ինչպես նաև երեխաների համար մանկական զարգացման կենտրոնների ստեղծում։ Միաժամանակ, տեղահանված անձանց հնարավորություն է տրվում մասնակցելու մասնագիտական կրթության դասընթացների և մասնագիտանալ տարբեր ոլորտներում։ Այդ ամենից բացի՝ մենք ընդլայնում ենք մեր կողմից տրամադրվող աջակցության շրջանակը և օգնում Ուկրաինայի պատերազմից տուժած ընտանիքներին՝ հատուկ ուշադրություն դարձնելով ինչպես սոցիալական, այնպես էլ բիզնես օգնության տրամադրմանը՝ նոր միջավայրում նրանց ինտեգրումն առավել սահուն դարձնելու համար։

Մեր գործունեությունը Հայաստանում շատ ավելի վաղ արմատներ ունի․ օգնություն ենք սկսել ցուցաբերել դեռևս 1988 թվականի Սպիտակի երկրաշարժի ընթացքում, այնուհետև մարդասիրական օգնություն ենք տրամադրել 1990-ականներին Լեռնային Ղարաբաղի հակամարտության ժամանակ։ Այս ամենը սկիզբ դրեց Հայաստանում մեր գործունեությանը, իսկ գրասենյակը պաշտոնապես հիմնվեց 2003 թվականին։ Այդ ժամանակից ի վեր՝ մենք իրականացրել ենք բազմաթիվ ծրագրեր ու նախաձեռնություններ տնտեսական ինտեգրման և աշխատատեղերի ստեղծման, բիզնեսի աջակցման, գյուղական տուրիզմի խթանման, միգրացիայի, քաղաքացիական կրթության և երիտասարդների հզորացման ու մարդու իրավունքների ոլորտներում։  

Մեր ընթացիկ ծրագրերին կարող եք ծանոթացել ՄԵՐ ԱՇԽԱՏԱՆՔՆԵՐԸ բաժնում։