ՄԱՍՆԱԿՑՈՒԹՅԱՆ ՀԱՅՏ Միգրացիայի ոլորտի քաղհասարակության կազմակերպությունների համար

Այս նախաձեռնության նպատակն է հզորացնել Հայաստանում ազգային և տեղական մակարդակներում գործող ՔՀԿ-ներին՝ խթանելով նրանց կարողությունները՝ միգրացիայի, ինտեգրման և սոցիալական փոփոխությունների հետ կապված մարտահրավերներին դիմակայելու և ոլորտային բացերը լրացնելու համար:

Հայաստանի 10 մարզերից և Երևանից մինչև 20 ՔՀԿ հնարավորություն կունենան ձեռք բերել և զարգացնել կարևոր հմտություններ, որոնց շնորհիվ կկարողանան ավելի արդյունավետ համագործակցել շահառուների հետ, գնահատել տեղական սոցիալական ծառայությունների կարիքներն ու ռեսուրսները, ներգրավվել քաղաքականության երկխոսության մեջ և իրականացնել փաստերի վրա հիմնված շահերի պաշտպանություն:

Բացի այդ, ակնկալվում է ստեղծել միգրացիոն ՔՀԿ-ների ամուր ցանց, որոնք կտրամադրեն որակյալ ծառայություններ միգրանտների տարբեր խմբերին:

Կարողությունների զարգացման թեմատիկ ուղղությունները

Ծրագրի շրջանակում ընտրված ՔՀԿ-ները կմասնակցեն հատուկ մշակված, թեմատիկ և իրենց կարիքներին համապատասխան աշխատարանների։ 4-5 օր տևողությամբ այս դասընթացներին զուգահեռ՝ կլինեն նաև մենթորային ուղղորդումներ՝ կազմակերպությունների կարողությունների զարգացման պլաններում վերհանված թեմաներով։ Այս մոտեցումը հնարավորություն կտա մասնակից ՔՀԿ-ներն անմիջականորեն նոր գիտելիքներ և մոտեցումներ կիրառել իրենց գործընթացներում և գործելակերպում՝ շոշափելի և կայուն արդյունքների հնարավորություն ստեղծելով։

Կարողությունների զարգացման աշխատարանների թեմաներն ընդգրկում են, բայց չեն սահմանափակվում հետևյալով․

• միգրանտների ծառայությունների մատուցման տեխնիկական հմտություններ,
• միգրանտների հետ աշխատող անձնակազմի հոգեբանական և սոցիալական պատրաստվածություն,
• միգրացիոն տերմինաբանություն,
• միգրացիոն օրենքներ և կարգավորումներ,
• ֆոնդհայթայթում,
• ծրագրի կառավարում,
• շահագրգիռ կողմերի ընդգրկում։

Գրանցված ՔՀԿ-ներ, որոնք ներգրավված են միգրացիոն ոլորտ մարտահրավերների լուծման գործընթացներում՝ միգրանտների տարբեր խմբերին ծառայությունների մատուցման և միգրացիոն քաղաքականության փոփոխությունների քարոզչության միջոցով։

Ծրագրի թիրախային կազմակերպությունների ընտրությունը կլինի մրցակցային, իսկ հայտերը կգնահատվեն հետևյալ չափանիշներով.

• Հարցազրույցներ վերջնական ընտրության համար՝ տեղում նախնական ընտրություն անցած թեկնածուների հետ,
• Մեկնարկային աշխատաժողով ընտրված մասնակիցների համար,
• ՔՀԿ-ում կարիքների և բացերի բացահայտում,
• Կարողությունների զարգացման սեմինարներ,
• Անհատական մենթորություն,
• «Չկոնֆերանս»․ ՔՀԿ-ների կողմից նախաձեռնված և նրանց կողմից առաջարկված թեմաները քննարկող համաժողով, որի ընթացքում կազմակերպությունները կկիսվեն իրենց փորձով և համագործակցային դաշտ կստեղծեն,
• Միգրացիոն ոլորտում ծրագրերի իրականացման համար ֆինանսավորման հնարավորություն։

Կարեւոր ժամկետներ

Առցանց տեղեկատվական հանդիպում` 2024թ․ հունվարի 30-ին, 16։00-17։00։

Հանդիպման Zoom հղումն այստեղ է։

Դիմելու վերջնաժամկետ` փետրվարի 15, 2024թ․

Հարցերի համար խնդրում ենք գրել հետևյալ հասցեին` grantsarmenia@peopleinneed.net.

Ինչպե՞ս դիմել

Հետաքրքրության դեպքում խնդրում ենք լրացնել հայտը:

Լրացված հայտը մինչև վերջնաժամկետը պետք է ուղարկել grantsarmenia@peopleinneed.net հասցեին՝ ուղարկվող նամակի թեմայի հատվածում նշելով “MPF_CSO capacity building”․

«Միգրացիայի կառավարման համակարգի ամրապնդումը Հայաստանի Հանրապետությունում» ծրագրի նպատակն է հակազդել դեպի ԵՄ անդամ պետություններ անօրինական միգրացիային՝ ապահովելով վերադարձողների ու օտարերկրյա քաղաքացիների հաջող ինտեգրումը ՀՀ-ում։ Այն ֆինանսավորվում է Եվրոպական միության կողմից՝ Միգրացիոն գործընկերության գործիքի (MPF) և Միգրացիոն քաղաքականության մշակման միջազգային կենտրոնի (ICMPD) միջոցով։ Ծրագիրը մի կողմից աջակցում է միգրացիայի և ինտեգրման քաղաքականությունների մշակմանն ու կատարելագործմանը, մյուս կողմից՝ ամրապնդում է ինչպես դեպի Հայաստան ներքին միգրացիայի կառավարման համար պատասխանատու պետական հաստատությունների, այնպես էլ միգրանտների տարբեր խմբերին ծառայություններ մատուցող քաղհասարակության կազմակերպությունների կարողությունները։ Ծրագրի շրջանակում մենք սերտորեն համագործակցում ենք ՀՀ Աշխատանքի և սոցիալական հարցերի նախարարության, ՀՀ Միգրացիայի և քաղաքացիության ծառայության, Սփյուռքի հարցերով գլխավոր հանձնակատարի գրասենյակի, տարածաշրջանային և տեղական իշխանությունների, քաղաքացիական հասարակության և մեդիա դերակատարների հետ։