Երեխաների համար նախատեսված եվս երկու կենտրոն է հիմնադրվել
Հրապարակվել է 25 դեկ, 2025 թ. կարդալու ժամանակը՝ 2 րոպե Sdílet: Sdílet článekՅՈՒՆԻՍԵՖ-ը, Ճապոնիայի կառավարության՝ Ճապոնիայի միջազգային համագործակցության գործակալության (JICA) ֆինանսական աջակցությամբ և «Մարդը կարիքի մեջ» ՀԿ-ի ու տեղական գործընկերների հետ սերտ համագործակցությամբ, Մալիշկայում (Վայոց Ձորի մարզ) և Բարձրավանում (Սյունիքի մարզ) հիմնադրել է երեխաների համար նախատեսված երկու նոր կենտրոն։ Վերանորոգված կենտրոններն անվտանգ և ներառական միջավայր կապահովեն 5-ից 17 տարեկան երեխաների համար, այդ թվում՝ փախստական ընտանիքներից։
Մալիշկան, որտեղ ապրում է ավելի քան 350 երեխա, այդ թվում՝ 48 փախստական, և Բարձրավանը, որտեղ ապրում է 19 երեխա, որոնցից 12-ը փախստականներ են, այժմ ունեն սոցիալական շփմանը և էմոցիոնալ բարեկեցությանը նպաստող հնարավորություններ։
Երկու կենտրոնների վերանորոգման և կահավորման որոշումը կայացվել է տեղական ինքնակառավարման մարմինների հետ համատեղ՝ երեխաների կարիքների համապարփակ գնահատման արդյունքում։ Վերջինս ցույց է տվել երեխաների համար անվտանգ և համակարգված միջավայրի հրատապ անհրաժեշտությունը: Ընդ որում համայնքները պարտավորվել են իրենց բյուջեներում ներառել կենտրոնների գործունեության շարունակականությունը՝ հոգալով կոմունալ ծառայությունների ծախսերը և աշխատավարձերը։
«ՅՈՒՆԻՍԵՖ-ում մենք ասում ենք, որ յուրաքանչյուր երեխայի համար պետք է հասանելի լինեն անվտանգ, ջերմ և աջակցող կենտրոններ իրենց իսկ համայնքներում», – նշել է Հայաստանում ՅՈՒՆԻՍԵՖ-ի ներկայացուցչի տեղակալ Սիլվիա Մեստրոնին։ «Այսպիսի կենտրոնները երեխաներին հնարավորություն են տալիս միասին խաղալ, կարդալ, ինքնարտահայտվել և մասնակցել համատեղ միջոցառումների, որոնք զարգացնում են անձնական դիմակայունություն, ինքնավստահություն, ստեղծագործական միտք, սոցիալական շփումներ և պատկանելության զգացում»։
«Այս կենտրոնները հատկապես կարևոր են այն համայնքներում, որոնք ընդունել են փախստական երեխաների և դեռահասների, ովքեր վերապրել են կորուստ, տեղահանում և հոգեսոցիալական սթրես», – նշել է Ճապոնիայի միջազգային համագործակցության գործակալության մշտական ներկայացուցիչ պրն Ջունջի Վակույին։ «Մալիշկայի կենտրոնի պես երեխայակենտրոն վայրերը կենսական դեր են խաղում ներառական և անվտանգ միջավայրերի ձևավորման գործում, որտեղ փախստական և հյուրընկալող համայնքների երեխաները կարող են միասին ինտեգրվել, մեծանալ և օգտվել հոգեսոցիալական ու այլ աջակցող ծառայություններից»։
«Երեխաների համար նախատեսված նոր կենտրոնների ստեղծումը վկայում է, որ երբ համայնքը, գործընկերներն ու քաղաքացիական հասարակությունը միավորում են ջանքերը, համայնքում հնարավոր են դառնում երկարատև և դրական փոփոխություններ: Մալիշկայի և Բարձրավանի կենտրոնները ստեղծվել են հենց նման ձևաչափով՝ ՅՈՒՆԻՍԵՖ-ի, համայնքների և «Մարդը կարիքի մեջ» ՀԿ-ի միջև ձևավորված ամուր գործընկերության արդյունքում ։ Մեր երախտագիտությունն ենք հայտնում Եղեգնաձորի և Գորիսի համայնքապետարաններին՝ ողջ գործընթացում ցուցաբերած ակտիվ ներգրավվածության և աջակցության համար: Հավատացած ենք, որ այս կենտրոնները դրական և երկարատև ազդեցություն կունենան երեխաների զարգացման և համայնքների հզորացման գործում», – նշել է «Մարդը կարիքի մեջ» ՀԿ-ի Հայաստանյան գրասենյակի տնօրեն Վարդուհի Դադունցը:
