Հանդիպում մեդիապատասխանատուների հետ

Հոկտեմբերի 16-ին Ներքին գործերի նախարարությունը, ՆԳՆ միգրացիայի և քաղաքացիության ծառայությունը և «Մարդը կարիքի մեջ» միջազգային հասարակական կազմակերպությունը համատեղ հանդիպում են ունեցել զանգվածային լրատվության միջոցների պատասխանատուների հետ։

Քննարկմանը մասնակցել են ՆԳՆ միգրացիայի և քաղաքացիության ծառայության և «Մարդը կարիքի մեջ» ՀԿ-ի ներկայացուցիչները։

Քննարկման սկզբում Միգրացիայի և քաղաքացիության ծառայության պետ Արմեն Ղազարյանը ներկայացրել է երկխոսության գործընթացը, ակնկալվող գործողությունների ծրագիրը՝ այլ երկրների փորձով, քանի որ ՀՀ-ԵՄ համատեքստում այն դեռևս մշակված չէ։ Այնուհետև անդրադարձ է կատարվել վիզաների ազատականացման գործընթացի քայլերի հաջորդականությանը, ընթացակարգերին և ժամկետներին։

Քննարկման շրջանակներում կարևորվել է այն, որ հանրային հաղորդակցությունը միգրացիայի կառավարման ոլորտում նոր հնարավորություններին, մարտահրավերներին արձագանքելու առանցքային գործիքներից մեկն է, քննարկվել է նաև միգրացիոն ոլորտի աջակցմանն ուղղված «Մարդը կարիքի մեջ» ՀԿ-ի աշխատանքները, որոնք ներառում են միգրանտ խմբերի աջակցություն, սոցիալական ծառայությունների բարելավում միգրացիայի կառավարման հնարավորություններին և մարտահրավերներին արձագանքելու նպատակով։ 

Հանդիպման ավարտին լրատվամիջոցների ներկայացուցիչները թեմայի համատեքստում հնչեցրել են իրենց հուզող հարցերը և ստացել պատասխաններ։

Հանդիպումը իրականացվել է «Մարդը կարիքի մեջ» հասարակական կազմակերպության «Միգրացիայի կառավարման համակարգի ամրապնդումը Հայաստանի Հանրապետությունում» ծրագրի շրջանակում, որը համաֆինանսավորում է Եվրոպական միության Միգրացիոն գործընկերության գործիքի (MPF) շրջանակում՝ Միգրացիոն քաղաքականության մշակման միջազգային կենտրոնի (ICMPD) միջոցով։