TVET Report 2020
Զեկույց Հայաստանի Հանրապետության Շիրակի մարզում աշխատանքի շուկայի (ոլորտային հմտությունների) գնահատման վերաբերյալ
«Անցում կրթությունից՝ աշխատուկա» ծրագրի շրջանակում «Մարդը կարիքի մեջ» (People in Need) միջազգային կազմակերպության նախաձեռնությամբ, «Բիզնես և կրթություն գործընկերություն» հիմնադրամը (ԲԿԳ) իրականացրել է հետազոտություն, որի հիմնական նպատակն էր ուսումնասիրել ՀՀ Շիրակի մարզում տեքստիլի և ագրոբիզնեսի, ինչպես նաև հարակից հատվածներում ներգրավված ընկերություններում առկա պահանջարկի և իրական առաջարկի (ան)համապատասխանությունը աշխատուժի նկատմամբ: Հետազոտության արդյունքում բացահայտվել են աշխատաշուկայում առկա խնդիրները՝ հստակեցնելով դրանց ուժեղ և թույլ կողմերը առանձին վերցրած մասնագիտական կամ ոլորտային համատեքստում: Մարզային աշխատաշուկայի ուսումնասիրությունը որոշարկել է նաև գործատուների պահանջները նախնական և միջին մասնագիտական կրթությամբ մասնագետների հմտությունների և կարողությունների նկատմամբ: Բացի այդ, ազատ աշխատուժի և թափուր աշխատատեղերի միջև առկա բացերի վերլուծությունը հանգեցրել է համապատասխան մեխանիզմների մշակման և հստակ քայլերի իրականացման անհրաժեշտությանը՝ աշխատաշուկայում և ՄԿՈՒ համակարգում գոյություն ունեցող անհամապատասխանությունը նվազեցնելու նպատակով:
Հետազոտության հիմնական խնդիրներն էին.
- գնահատել համապատասխան ոլորտներում աշխատաշուկայի զարգացումները,
- կատարել աշխատաշուկայի որակական ուսումնասիրությունը ՀՀ Շիրակի մարզի ընտրված ոլորտներում,
- ուսումնասիրել գործատուներին հանդիպած խոչընդոտները թափուր աշխատեղերի լրացնելու գործընթացում,
- բացահայտել աշխատանք որոնողներին հանդիպած դժվարությունները ընտրված ոլորտներում,
- որոշարկել (ան)համապատասխանության աստիճանը գործատուների իրական պահանջարկի համապատասխան մասնագետների/մասնագիտությունների և նրանց կարողությունների նկատմամբ,
- ուսումնասիրել առկա բացերի նվազեցման/կրճատման հնարավոր ուղիները: